《Sing光路上》今集有 黃博 接受 潘盈慧 專訪，黃博讀書時主修編導技巧，而畢業後亦擔任記者同節目編導工作，同一直心愛嘅音樂可以話「這麼近、那麼遠」，一直到後來喺香港工作，有機會接觸到《中年好聲音3》，先重燃「愛火」。
本來打算報名見識一下，試音更未特別打扮，到公佈百名入圍人選，要出席錄影先令黃博開始擔心，佢更認為自己技術一般，首次參與就將係最後一次嘅心情出席，完全冇估到會一直殺入決賽稱冠。
佢仲指決賽當日父母親身到啟德現場打氣，而父母兩人心情更比自己仲激動。至於因工作關係來港，更同老公「峰哥」結緣，由慢慢約會到成為老公，黃博甜蜜分享當時嘅每一個細節，仲笑指以為自己會一直單身，冇諗過會有人陪自己繼續走往後人生路。
