52歲劉愷威與32歲黎紀君（Christy）相戀，二人公開認愛後打得火熱，網上甜蜜足跡不斷，不時打波曬幸福。呢日爸爸劉丹出席活動，講起阿仔新戀情時，丹爺話見阿仔拍拖開心，自己都好開心。
丹爺同太太李馥瑩對Christy好滿意，話阿仔有帶Christy見家長，之不過大家見面時間短，未係好了解，丹爺話估孫女劉苡馨（小糯米）應該知情，身邊嘅馬海倫讚愷威好識做，相信愷威會處理好，又大讚小糯米係開心果，好叻又轉數快，丹爺聞言則在旁哈哈大笑。
《愛‧回家之開心速遞》落幕後，丹爺休息咗一段時間，順利完成膝關節嘅小手術，恢復良好，丹爺亦精神奕奕話做完手術第三日已落地行，一開始扶住行，一個星期左右已可以拎拐杖行。好友馬海倫一直知丹爺有膝蓋舊患，但唔影響當時《開心速遞》拍嘢，丹爺話目前仍要繼續操練。
78歲馬海倫獲網民讚唔似真實歲數，馬海倫話年尾迎嚟79歲，自己喺疫情嗰陣冇機會打golf，馬海倫就走去行山，後來聽發哥周潤發話緩步跑係好，馬海倫就跟住練，而家最多係跑10K，覺得做到10K已經好好！
