陳煒 陳敏之 姚子羚 傅嘉莉 等一眾女藝人，呢日為下星期四晚舉行嘅《萬千星輝賀台慶》表演環節「炫舞女王」綵排，四位女王更即興Freestyle除外套，令大家涼風之下都睇到火辣辣。煒哥同敏之更預告演出當晚將會更性感，又會喺台上換衫，而一連串嘅養眼演出，其實係想向多年來一眾梳化服同事致敬，答謝佢哋嘅付出，令大家可以靚靚上鏡。
為咗喺台慶有最好表演，子羚同Kelly都落足力練舞，而且子羚仲係相隔多年再獻舞技，佢話自己隻舞唔難記，但舞速快又要兼顧道具。另外Kelly係首次個人跳舞演出，所以心情緊張。
好快就到台慶夜，不過最近忙於宣傳台慶劇《玫瑰戰爭》嘅子羚同Kelly就話仲未有時間準備戰衣。Kelly話只係安排平日宣傳劇集嘅衫已經夠忙，另外子羚就話有件珍藏喺衣櫃入面，如果真係無時間搵衫，就出動珍藏。
