返嚟喇返嚟喇！男臣歸位喇！當年《超時空男臣》播出時，引起唔少熱話，觀眾們更加係準時追劇睇下三位男臣喺現代又鬧出咩笑話。相隔九年，幾位男臣終於再次歸位拍攝《超時空男臣II》，之前喺銅鑼灣鬧市拍宣傳片時，已經引嚟唔少途人圍觀拍片。
今次三位男臣身負重任，要搵返太子同公主，而喺預告片片尾，似乎仲有位big boss等緊佢哋！雖然暫時仲未知今次 蕭正楠 曹永廉 同 何廣沛 三兄弟，又會經歷啲咩爆笑而驚險嘅經歷，不過馬國明日前同阿蕭、阿廉出席節目巡禮時，就話因為自己冇份拍而相當失落！阿蕭話而家佢哋考慮緊十年後拍第三輯，仲話到時等阿廉唔喺度，馬明就可以頂對方個位，搞到阿廉不斷要吐口水話大吉利是。
阿蕭又讚之後加入訪問嘅三弟何廣沛，話對方因為要就自己嘅schedule而搞到要天地更，仲叫因為唔夠瞓而呆呆嘅三弟，瞓入佢懷抱休息下！