方力申 挑戰港澳慈善渡海泳嘅日子進入倒數，雖然日日忙練水，不過有慈善活動，小方依然好積極參與。呢日一個跑樓梯比賽，連續第三年擔任活動大使嘅小方亦有現身支持，講起渡海泳，小方話已經準備得七七八八，不過近日左邊膊頭有啲痛，所以要減少練水。
即使操水再忙都好，小方仍然心繫囡囡Isla方愛嘉，盡量抽時間陪囡囡，佢話11個月大嘅囡囡已經識得分爹哋媽咪，對父母嘅愛又好公平，每朝行去錫完媽咪，就會再行埋佢度錫返啖，非常窩心。
跑樓梯大賽吸引唔少藝人報名，好似許惠菁、劉浩龍就組隊參賽，四位中聲唱將顏米羔、李金凱、陳旭培同梁浩賢亦有組隊，現場仲有唔少粉絲幫佢哋打氣，四位唱將亦冇令大家失望，均以佳績完成，首先衝線嘅米羔笑言自己喺屋邨長大，自細就不時行樓梯。
