著名電視節目主持人葉特生於1981年加入TVB，憑氣質儒雅嘅書生形象、委婉得體嘅口才，深受觀眾歡迎，曾擔任王牌晨早節目《香港早晨》第一代主持，又曾主持《K100》，其後因患癌淡出幕前並移居美國，成為基督教傳道人及牧師。TVB前企業傳訊部宣傳科副總監曾醒明近日相約「🎊昔日老友重聚喜相逢🎊」，更分享敘舊合照及多張珍貴舊照。
相中見葉特生身穿淡綠色休閒服，跟當年喺公仔箱以西裝革履、溫文爾雅嘅英俊書生形象大相逕庭，雖然外貌留下歲月痕跡，但葉特生精神飽滿、笑容溫和，嗰份自然流露嘅親和力始終未變。
曾醒明感謝TVB製作部前監製蕭國雄來電相約午聚，今次暌違多年資深傳媒人葉特生由洛杉磯返港傳道，眾人趁機相約午餐聚會，曾醒明回想於1983年籌辦「送炭到泰北」慈善活動並舉辦一個圖片展覽，曾醒明稱當年只係公關部一名低級公關助理，大膽向「香港早晨」大紅人葉特生邀請，未想到葉特生義不容辭，答允擔任演唱會司儀及出席圖片展揭幕剪綵，曾醒明多年嚟對葉特生嘅義重情深，一直銘記在心。
葉特生於1980年代主持《香港早晨》及《K100》等TVB經典王牌節目，成為香港家喻戶曉嘅當家主持。葉特生於1986年11月不幸證實患胃癌，喺事業高峰期淡出幕前，先後接受四次化療，葉特生隨後移民洛杉磯，轉行成為傳道人，把心靈寄託於信仰。
葉特生於2018年底被診斷出肝臟懷疑有腫瘤，當年特意返港與親友道別，曾去教會分享，再返美接受治療。葉特生兩度面臨生命考驗後，依然精神奕奕、笑容滿面，確實令人感受到健康與豁達心境嘅可貴。
