樂壇天王劉德華睽違多年再推全粵語實體碟《About Life》 親自包辦曲詞細訴人生體會，更移師浸會大學音樂廳動員管弦樂隊現場錄音，首支新歌《我年輕過》將於今日於各音樂平台登場，同名MV同步曝光。
華仔分享今次新碟錄唱嘅心情，指如今生活常態已發生許多變化，但華仔呢個念舊之人仍然鍾情於實體唱片，因為拎喺手先覺得珍貴，華仔今次將演唱會與唱片同步以《About Life》命名，整張專輯全為粵語作品，令樂迷驚喜係新碟收錄六首新歌當中，華仔更參與其中五首歌曲嘅作曲及填詞部分，將近年對生活嘅感悟毫無保留咁注入音樂之中。華仔除咗有錄音室版本，仲特別準備現場錄音版本，正如華仔所言：「為何會有現場版？並非僅因音質優美，更在於其真實感。這次演唱會及專輯均命名為《About Life》，一個唱給你們聽，一個唱給自己聽。」
華仔今次專程帶領全體工作人員、合唱團以及管弦樂樂手，移師香港浸會大學音樂廳進行現場錄音與錄影，追求極具質感與溫度嘅音樂效果，整個項目總共用咗四日時間完成，包括前期準備與排練，最後兩日正式進行錄音及錄影，華仔深有感觸地分享：「錄音時，無論相識與否，眾多人士從旁協助，令我深受感動。面對龐大的管弦樂編制和合唱團，每一位樂手和工作人員都百分百投入，甚至在正式錄音的時候，大家依然好專注地完成了整個錄音。」
順利完成嗰一刻，華仔坦言內心非常激動，令佢格外珍惜一路走嚟嘅點滴：「這段旅程由我年輕時開始，伴隨父母、太太及女兒，最後還有你們。我想你們會非常明白。關於生活，關於愛。」
回顧華仔音樂創作歷程，華仔早喺1990年就發表第一首填詞作品《如果你是我的傳說》。華仔多年嚟參與填詞嘅歌曲至今已累積超過200首，且絕大多數都係由佢個人獨立完成，由從早期熱血情歌到如今沉澱過後嘅成熟心境，華仔詞作一直以來陪伴住許多人成長。
今次新作《我年輕過》、《爸爸》、《萱草》、《芬芳》及《小天使》，以及徐繼宗包辦曲詞嘅《喜歡過我》，歌名同內容非常貼地，所寫嘅內容係華仔呢幾年來對生活、家人，以及身邊人和事嘅真實體會，字裏行間流露出一份又一份嘅真情實感。
