真人版《One Piece》（海賊王）自播出以來好評如潮，其中飾演「草帽海賊團」御廚「山治」（Sanji）嘅英籍男星 Taz Skylar，憑藉紳士魅力俘虜全球無數粉絲。早前Taz Skylar因工作關係旋風式訪港出席公開活動，雖然今次行程緊湊，但 Taz Skylar 同團隊都抽出時間於各區漫遊，體驗香港獨特嘅城市風貌，而身為草帽海賊團御廚嘅佢，更拉埋團隊一齊挑戰地道傳統美食——皮蛋，展現出佢劇內劇外都對世界各地食材嘅好奇心！
向來熱愛冒險與戶外活動嘅Taz Skylar，趁住訪港空檔親身走訪香港各個標誌性地點：山頂、尖沙咀、九龍城、旺角、太子、灣仔等地，從繁華嘅街景到充滿歷史感嘅小巷，佢以鏡頭記錄低香港獨有嘅魅力，更喺社交平台多次發帖文，分享呢次香港精彩嘅旅程花絮。
身為劇中嘅靈魂「廚師」，Taz Skylar對美食同樣有份執著與熱情。呢次香港之旅，佢同團隊更入鄉隨俗，大膽試食皮蛋。這項充滿挑戰性嘅「黑色美食」考驗到唔少外國人嘅接受能力，而Taz Skylar與團隊嘗試時嘅生動反應，亦相當搞笑，Taz Skylar將皮蛋送入口中咀嚼咗一陣後，即面有難色，最後更頂唔順要走出店外「解決」口中複雜嘅味道。
