飲食節目《美食強人》話咁快就到尾聲，幾位主持人 陳豪、 龔嘉欣、 林秀怡 同 陳浚霆 呢晚聯同喺節目中出力嘅大廚們及幕後一齊舉行慶功宴。
個個見到美味嘅乳鴿都急不及待落手品嚐，個個食到舐舐脷，一碟唔夠仲再嚟多碟，尤其喺節目中有得睇冇得食嘅阿Mo同嘉欣，更加係大飽口福，仲話如果有下次機會，佢哋想申請做試食專員，體驗四出探店嘅滋味。喺節目中見識到咁多餐廳，廿四孝爸爸阿Mo都好想帶小朋友去試吓，但就要搵到適合時機。
跟住《美食強人》搵食
一班主持人好唔捨得節目完結，加上節目咁受歡迎，佢哋同觀眾一樣想有第二季延續，更重要嘅係大家可以合力推動飲食業，呢個係節目組嘅初心。
節目出街後，阿Mo同嘉欣都收到好多朋友詢問佢哋餐廳資訊，而Andrew因為四出探店仲多咗個身份，就係負責幫好友訂餐廳留位。秀怡就錯過咗一間連譚詠麟都幫襯嘅拉麵，大感失望。
