胡杏兒同馮德倫合作新戲《第四幕》，杏兒接受《電影泉攻略》訪問，分享拍攝點滴，佢話印象最深刻係一場掌摑Stephen嘅戲，因為用力過猛，連自己都嚇親，好彩Stephen完全唔介意，反過嚟安慰佢。
杏兒話自己現階段對角色嘅認識同初入行有好大分別，因為年紀大咗，更容易將自己嘅人生經歷投射入角色當中，好似依家做媽咪嘅角色，直頭可以話係手到拿來。
杏兒依家除咗做幕前工作，佢亦重拾學生身分，喺香港演藝學院修讀幕後製作課程，佢話同學初初見到佢都覺得好驚訝，不過真正相處之後大家都好融洽，佢仲自嘲係全班最老學生。而佢依家最大嘅顧慮係全世界都知道佢讀緊書，如果冇辦法順利畢業，就會好冇面。
今個星期嘅新片速遞有
《第四幕》：過氣導演歐文為挽回尊嚴，決定自編自導自演新作。歐文漸漸迷失於戲劇同現實之間。面對老闆緊逼、舊拍檔強行介入，加上婚姻危機，歐文嘅情緒走向瘋狂。儘管他排除萬難要素人漢娜擔正主演，但就喺首演夜，迎嚟咗一場無法挽回嘅失控殘局。
《打劫銀行是咁的》：YouTuber拍片教人「完美打劫銀行」，不為錢財，只求「劫富濟貧」？警方捉佢唔到，銀行奈佢唔何，誓要將這群「慈善」劫匪捉拿歸案。究竟呢場貓捉老鼠遊戲，邊個先係最終贏家？
《衰鬼聖誕頌》：今個11月，怪誕男神Johnny Depp再創癲瘋，變身「孤寒財主」史高治。熟悉名字，變出破格故事。暗黑奇幻鬼才導演泰韋斯驚喜操刀，聯同一眾荷里活紅星，同你搶先迎聖誕。
今個星期嘅票房龍虎榜，截至11月11日中午為止，第一位《哥斯拉-0.0》、第二位《我阿爹想旅行》、第三位《善男信女》。
