吳家樂於2006年迎娶其士集團創辦人周亦卿千金周蕙蕙，由於周氏家族資產估計高達數十億元，女方家族財力雄厚，吳家樂被外界冠上「50億駙馬」稱號。吳家樂早前接受梁靖琪（Toby）網上節目訪問，以極高EQ自嘲姓氏變長，大爆豪門千金老婆非常慳家，令昔日大花筒嘅吳家樂徹底改變價值觀。
吳家樂與愛妻周蕙蕙結婚至今廿年，育有一女及一對孖生仔。周蕙蕙出身豪門並繼承家族生意，但其作風低調樸素，平日唔愛用名牌，與吳家樂鍾意去茶餐廳同車仔麵店。對於早年「黐金糠」嘅閒言閒語，呢個伴隨廿年嘅標籤，吳家樂笑指早已習慣，更自嘲而家唔係姓「吳」，而係「五十億駙馬吳家樂」，因為次次新聞報道都係咁去形容。
吳家樂面對網民與外界批評，佢毫不在乎，內心最介意係太太、外家同屋企人點睇，覺得其他人講嘢唔使理，吳家樂用20年光陰證明真心，更透露太太周蕙蕙講過「唉，你要假都唔會假20年、30年啦，我同你結咗婚都20年啦」，成為二人婚姻最踏實嘅證明，吳家樂亦坦言而家自己所擁有嘅嘢，喺婚前其實早已擁有。
吳家樂憶述單身寡仔嗰陣貪靚又揮霍，招積到揸跑車返工，年年換車，貪靚又鍾意買衫，「搵6000就買8000嗰啲人」，後嚟呢位「大花筒」認識太太周蕙蕙後，吳家樂爆太太生活慳家貼地，吳家樂價值觀被徹底顛覆，明白到「需要」同「想要」嘅嘢係唔同，體會到「曾經擁有過就算」。吳家樂以前鍾意揸車，而家會覺得泊車太貴，自己會搭唔同嘅交通工具。
吳家樂坦言一段長達廿年嘅婚姻得來不易，彼此相處要不斷磨合，二人恩愛婚姻秘訣在於為家庭學識忍讓。吳家樂自認脾氣火爆暴躁，但佢知道呢個性格係有代價，「有啲說話係唔講得」，無論點都會喺小朋友嗰度諗，唔可以咁衝動，從而學懂退一步同講「對唔住」， 放下無謂嘅自尊，兩公婆互相包容。
