52歲劉愷威與細20歲新歡黎紀君打得火熱，熱戀期不時高調放閃，連「波友」洪永城早前受訪都話二人愛得癡纏似「糖黐豆」形影不離，黎紀君更透露男友嚟緊多咗時間留港，唔少網民將焦點放喺劉愷威與前妻楊冪所生嘅12歲愛女「小糯米」身上。
丹爺劉丹日前出席活動，被問孫女知唔知爸爸新戀情，好友馬海倫心直口快爆「小糯米」喺英國升學，但丹爺對阿仔有信心，相信阿仔會處理好。網民對於「小糯米」獨自海外讀書，劉愷威則留港與新歡拍拖，有網民質疑佢忽略愛女。有粉絲睇唔過眼，就喺網上公開與偶像身邊工作人員嘅對話，稱偶像劉愷威早喺去年4月起，已暫停所有幕前工作，專程去英國陪「小糯米」長達一年半。
有報道聲稱劉愷威因英國陪讀簽證規定，適用於4至11歲就讀認可私校嘅學童家長，一旦仔女年滿12歲，陪讀簽證便即時終止且無法續簽，家長必須按例離境，往後只能以一般訪客簽證赴英探望，該名粉絲稱劉愷威係陪讀簽證期滿先返港，並非只顧住新戀情。
劉愷威與楊冪自2018年宣布離婚，小糯米多年嚟留港讀書，劉愷威不時陪小糯米參加學校活動、四處遊玩，曾喺學校周年晚宴上，與小糯米溫馨同台合唱，又曾被網民捕獲帶小糯米去加拿大旅行，劉愷威一直好保護小糯米私隱，希望阿女健康愉快成長。
