為咗迎接11月19號《萬千星輝賀台慶2026》，TVB逾80位藝員把握千載難逢機會，前所未有踏足12月先開啟嘅中九龍繞道九龍灣段，仲動用近20架豪華房車作背景，捕捉香車配美人嘅畫面，大堆頭跳舞拍攝台慶序幕，氣勢如虹。一眾藝人事前都頻頻熱身做足準備，連TVBuddy都喺現場助陣一齊舞動。
企喺頭排嘅有視帝 張振朗、 劉穎鏇 仲有 朱敏瀚 等，佢哋好明顯要肩負領軍嘅重任，Tiffany對於企C位多少有啲壓力，相反振朗同朱仔就笑指都係睇住Tiff跳舞，輕鬆跟隊，冇擔心跳錯影響到後面，因為自己當下睇唔到，三人都會盡力跟上。
另一個焦點就落喺 陳曉華 同 朱敏瀚 分手後同框嘅畫面，兩人雖然相隔幾個身位，但就冇咩交流，各自精彩。而呢晚Hera就要同 羅天宇 共舞，重現《幗國梟雄4》天宇抱起Hera一幕。Hera爆之前拍攝時，天宇抱起佢後氣來氣喘，天宇如今再度抱起Hera完全冇呢種感覺，因為對方瘦到好似紙咁薄，Hera乘機讚自己減磅成功。不過喺隧道跳舞令天宇有另一種難度，因為路上有暗斜，擔心抱起Hera時會側重一邊，令佢全程都緊張到一額汗。
在場見大家都好享受喺新隧道跳舞， 蔡潔 就懷住另一種緊張嘅心情，因為佢自從2013年選美時公開跳過舞後，相隔十幾年再度為公司活動獻舞技，希望唔好失禮，而好友 劉佩玥 就好期待呢個畫面。
仲有 周嘉洛、 吳偉豪 同 林凱恩 呢個愛回家嘅組合，三人一合體同以前一樣咁好動貪玩，即場嚟個Free style嘅舞步，三人都對自己嘅舞姿有信心。
鍾柔美 呢日就抱病上陣，但都冇影響佢活躍嘅一面，未埋位前仲同 詹天文 一齊落力排舞似模似樣，兩人好開心置身呢個可一不再嘅環境，仿如演出音樂劇一樣。
另外，好多藝員近日都傾力為台慶表演項目綵排，同時忙於搵戰衣，不過一向身材出眾嘅波波 黃婧靈 就未有著落，因為連日都喺公司排舞至深夜，但屆時一定會以華麗嘅裝扮亮相。
