九龍塘廣播道電台門口一向係追星族聖地，呢日一眾歌迷就係等樂壇天王劉德華，偶像華仔8年後再踏足廣播道宣傳，一眾粉絲非常熱情，華仔見到咁多熟悉嘅面孔 ，心情勁興奮，仲勾起好多青春回憶。
華仔話以前望出去見到好多燈牌，而家就見到好多電話，華仔心情好開心，感覺真係年輕過。華仔仲對呢個地方仍然好熟悉，笑指瞇埋眼都搵到洗手間。
華仔今次嚟宣傳新專輯，呢次除咗推出錄音室版本之外，仲聯同合唱團及管弦樂樂手進行現場錄音版，呢次新歌內容圍繞最愛嘅家人同生活，華仔話錄現場版只有四次機會，唱頭三次都決堤落淚，只好唱到最尾嗰段瞇埋眼唱，怕見到其他人喊，自己又忍唔住，華仔笑言考慮要唔要畀大家聽吓佢唱到亂七八糟嗰個樣。
華仔年底舉行跨年演唱會，透露好快要閉關準備，嚟緊樂壇頒獎禮就見唔到華仔身影，華仔對樂壇頒獎禮亦有感而發，好想凝聚廣東歌歌手力量，話而家所有頒獎禮都好獨立，出席歌手可能唔一樣，有機會分散咗歌手影響力。
華仔記得當年四台聯頒嗰時，自己都有份表演，佢都想呢啲現象出現番，華仔亦好想搞一啲廣東歌歌手活動，凝聚成個樂壇。問到華仔係咪搞個頒獎禮，華仔笑稱係「華獎」，仲話第一屆華獎，自己起碼有一個傳媒大獎啦。
