憑《獎門人》系列「獎老」一角入屋嘅前TVB藝人 吳嘉儀(阿七)，2023年8月同圈外男友「豬仔」Leo拉埋天窗。然而呢段僅維持三年嘅婚姻近日傳出破裂，阿七喺社交平台連環發文，宣佈正辦理離婚手續，更公開控訴丈夫婚後多宗罪；不過男方隨後接受傳媒訪問逐點反駁，令婚變演變成各執一詞嘅「羅生門」。
阿七日前於社交平台限時動態發表長文及影片，剖白指數年來為免家人擔心而選擇沉默，豈料卻助長男方控制欲。佢更控訴丈夫長期失業兩年，將人生不如意發洩於自己身上，唔止以暴力損毀家具同私人物品、又喺寓所安裝CCTV全天候監控，甚至曾稱「死咗拖去後山無人知」等言語威嚇。
阿七又指對方性格極度計較，曾要求同住嘅佢「交租」，近期滋擾行為更進一步升級，曾喺佢刷牙沖沖期間關水掣、熄熱水爐，又修改大門密碼鎖下逐客令，威脅唔立即搬走將銷毀佢所有物品。
而面對阿七嘅連環指控，Leo亦受訪反擊，全盤否認「問老婆攞錢」說法。佢澄清自己曾因遭裁員而短暫手緊，後來已轉行，強調婚前雙方早已達成共識，由他獨力承擔約150萬元置業首期同印花稅、每月近兩萬多元供樓開支同所有水電煤雜費，而阿七只需負責個人日常同娛樂消費。至於喺屋企安裝鏡頭，Leo辯稱只係因為嗌交時經常被女方舉機拍攝，裝CCTV純屬「自保」。
提及婚姻破裂真正導火線，Leo語帶保留稱若和盤托出恐令女方「前途盡毀」，更大爆阿七婚後經常外出飲酒作樂，更曾試過飲酒後失聯、徹夜不歸直至翌日中午先返屋企，當時女方竟解釋係「同男人喺樓梯傾偈到天光」。
此外，佢又指稱阿七早於2024年初、即新婚僅半年便經常將「離婚」掛在嘴邊，自己曾兩度順應要求簽妥離婚協議書，惟女方一次聲稱遺失、一次反口拒絕提交，直指對方今次單方面在網上公審令佢非常無奈。
事實上，兩人早於新婚僅四個月嘅2023年底，就曾因「改密碼鎖無家可歸」而鬧上新聞，當時阿七曾表明唔想做「離婚KOL」而低調處理。估唔到事隔兩年多，呢對夫婦最終仍走上公開決裂之路，而雙方講法更係南轅北轍，難辨誰是誰非。