無綫經典長壽處境劇《真情》播畢多年，依然係唔少香港人心目中嘅集體回憶。近日有網民就喺社交平台分享，驚覺當年劇中飾演靈魂人物好姨（梁潤好）嘅 薛家燕 ，於1996年加入劇組時年僅46歲。
該網民感嘆：「當時46歲嘅好姨有個女羅霖，大家覺得合情合理；今日同樣46歲嘅姚子羚，你點想像搵佢演好姨？家燕姐今年76歲，睇落仲有活力過當日嘅好姨，現代人老化減慢，30年後係點真係難想像。」
帖文隨即引發熱烈討論，更釣出 姚子羚 親自留言笑言：「如果《真情》翻拍，我都可以做好姨🤭」，幽默回應獲網民大讚大方又有自信。
網民感慨除反映現代女性保養得宜、年齡界限日漸模糊外，亦勾起大眾對家燕姐當年谷底翻身傳奇嘅敬佩。薛家燕當時經歷前夫婚外情而婚姻重創，一度陷入人生低潮，之後獨力肩負起撫養三名子女嘅重擔。
幸而最艱難的時刻，家燕姐獲TVB力邀復出參演《真情》，憑藉「好姨」一角演活慈母與精明女性形象，成功創下事業第二春。此後家燕姐越戰越勇，唔止於影視、主持同歌唱界作多線發展，更創立藝術中心培育新血；如今雖已76歲高齡，但無論體力抑或工作量依然驚人，至今仍活躍於幕前，堪稱娛樂圈「長青樹」。
至於被網民點名作對比嘅 姚子羚 無論外貌與身形均保持喺巔峰狀態，現年46歲嘅佢依舊少女感十足，同印象中「好姨」嘅形象大相逕庭。近年子羚於戲路上不斷尋求突破，不再局限於花旦框框，最近就於台慶劇《玫瑰戰爭》中飾演藝人經理人 藍鳳儀 就大騷精湛演技，將角色暗黑複雜內心同張力出色演繹，備受觀眾讚賞。若《真情》翻拍，以子羚演技與駕馭能力，新世代版「好姨」相信亦會別有一番味道。
myTV SUPER重溫《玫瑰戰爭》窺探娛圈秘聞
《玫瑰戰爭》星期一至五晚 20:30 翡翠台