蔡志明夫人同女兒 蔡加敏、何太梁安琪、鄧鉅明夫人、黃玉郎、孫佳君、譚俊彥夫婦、馬德鐘夫婦、Amanda S.同劉浩龍現身慈善晚宴。近日喺香港演藝學院攻讀戲劇電影制作藝術碩士課程嘅 胡杏兒 亦抽空現身，杏兒指重返校園令佢感到好開心，對於將來有無打算寫劇本做導演？杏兒就話一步步嚟，但佢話「胡說八道會」嘅好姊妹好支持佢，仲話如果功課上需要佢哋幫手，佢哋一定會出手相助。
應屆港姐冠軍 袁絲珩 同季軍 李澤欣 亦有現身盛會，兩人近日都忙於為稍後舉行嘅大型籌款活動做準備。而首次擔任大型活動司儀嘅袁絲珩，就話開頭都有少少緊張，但知道會拍住一班經驗豐富嘅拍檔，佢當堂鬆一口氣。至於李澤欣亦表示自己開始熟習做《東張西望》主持，而且過程好開心又得到好多幕前演出嘅經驗。
谷婭溦 最近開始一個廣東歌嘅傳承計劃，將多首金曲重新灌錄，佢話聽咗好多前輩嘅歌曲，而當中嘅歌詞，更深深打動佢，令佢越唱越投入。
