杜如風 主持嘅全新旅遊節目《跟風旅行團》將於16號喺翡翠台首播,今次杜如風會帶觀眾到首爾吃喝玩樂,並直認公器私用跟住偶像G-DRAGON嘅足跡。另一個重點係佢打扮成GD其中一個造型到GD寓所外拍攝,殊不知就被GD本尊反拍,雖然好開心,但也有失落:「最慘我睇佢唔到,但佢睇到我,不過都光宗耀祖啦﹗」![]()
![]()
眾所周知杜如風嘅偶像係梁朝偉,而家高調鍾意GD,杜如風話自己並冇變心,如果二選一,佢都會揀梁朝偉呢位超級偶像。
對於韓國兩字,杜如風回想十年前拍攝節目後被封「世界級港女」,笑言12年來冇拖拍都係因為呢個「名號」成為死因,講到又物質主意又拜金,係人聽到都驚啦﹗搞到自己對愛情都放棄狀態。![]()
不過今次首爾之行,杜如風坦言都係買到傻,想知有咩好介紹就要留意節目。而今次佢仲會喺節目中首次嘗試揸小型飛機,有畏高症嘅佢就話導演迫良為娼。
至於食方面,杜如風此行狂食醬油蟹,記得有次原本要對住鏡頭講嘢拍攝,點知啲蟹一嚟到,佢一口氣食咗八隻完全冇講過嘢係咁食。![]()
觀眾同粉絲曾經一度好擔心杜如風嘅肥腫難分,如今佢體重由130磅下降至104磅,足足減咗26磅,但又再次令人擔心佢過瘦,杜如風強調之前因為濕疹嚴重,食葯副作用所致,身體並無大礙,不過瘦又比人話瘦,肥又話肥,笑言大家好難服侍。![]()
杜如風透露隨住爸爸杜惠東離世,近年搬咗返屋企同媽咪同住,雖然唔習慣,但答應咗爸爸唔會同媽咪爭執。講到幾時同媽咪去旅行?杜如風就話因為屋企有隻好老嘅愛犬,成日都同媽咪講等隻狗死咗之後會帶佢去旅行,不過如果同阿媽去旅行,就一定乜嘢都買唔到。![]()
雖然爸爸已經離世多年,杜如風仍然會掛住爸爸,仲話爸爸生前寫好多專欄,以前係行船,自己亦出過書,又鍾意拍旅遊節目,算係繼承衣缽,佢只想個女認真工作,唔好掛住玩,佢已經願望達成。
《跟風旅行團》11月16號起 星期一至五晚 21:30 翡翠台