Sing光路上|黃博實現白日夢成未來之星 分享老公追求故事以為將單身生活

《中年好聲音3》冠軍 黃博 自小沉浸於音樂中長大,爸爸好鍾意玩樂器,每逢週末都均會同音樂之友共聚,然後叫阿女唱歌,慢慢黃博就被發掘出音樂細胞。讀幼稚園時佢已經被老師睇中做領唱,小學已加入合唱團,黃博回憶成長後都曾經有過歌手夢,仲話:「幾個女仔圍埋時,都發過白日夢要做歌手,仲話未來之星就是我。」而參加《中聲》選秀後,真係令黃博夢想成真。


父母對子女栽培理所當然,黃博嘅父母都唔例外,一直都希望女兒琴棋書畫皆精,所以細細個就安排黃博學習唔同才藝,令佢有一個充實嘅童年。不過佢心底亦有難過唔開心嘅時候,黃博曾經喊住向媽咪嗌辛苦。後來見黃博唯獨對彈琴有興趣,但因讀書壓力大,有日終於鼓起勇氣向父母反映暫停學習課外活動,即時見到爸爸眼有淚光,一心想栽培自己,但佢卻選擇中途放棄,當時佢自己都好難受。

直至讀大學時,黃博先有更多時間重拾音樂夢,又不時參加歌唱比賽,更有機會唱Demo同參與配樂工作。後來嚟到香港發展,認識《中年好聲音》節目,被專業感覺吸引報名一試,當時佢一心只係想學習,所以初期都以好簡樸打扮參加,知道入圍100強時非常驚訝:「點解會揀我?我廣東話又唔好,又唔靚,有得錄影已經好好,參加100強時我就同自己講係最後一次,將自己去飲嘅衫攞出嚟。」再後過關斬將獲獎,令父母都非常激動,完全冇諗過個女有呢個成就。

有樣嘢亦係黃博冇諗過,就係有一段美好婚姻,佢話之前覺得自己會一直單身生活,又分享同老公相識及接受追求經過,估唔到過程都幾浪漫。

另外,黃博近日推出第二首有份創作嘅新歌《花說》,佢希望觀眾同粉絲可以喺歌曲中搵到黃博嘅特色,未來都想推出更多治癒心靈嘅歌曲。