袁偉豪 同 張寶兒 2020年結婚後一直恩愛非常,先後誕下大仔「袁咕碌」(袁晞祐)同細仔「袁氹氹」,兩兄弟巧合地同樣於11月出世,令每年11月都成為一家四口最熱鬧嘅慶生月!日前一家人喬遷入空間寬敞嘅新居重組幸福家園,張寶兒亦喺社交平台公開為袁氹氹慶祝1歲生日嘅溫馨短片。
片段可見Bowie、阿Ben同即將踏入3歲嘅「袁咕碌」化身小廚師,於新居開放式廚房合力製作無添加香蕉蘋果蛋糕。爸爸袁偉豪耐心抱住袁咕碌一齊攪拌香蕉泥、將麵糊倒入烤盤壓平,又一齊跪喺焗爐前期待蛋糕出爐,父愛滿瀉。![]()
不過等等吓,Bowie就突然醒覺竟然犯下大烏龍——整個蛋糕由頭到尾完全忘記「落蛋」,發現烏龍後Bowie更忍唔住自嘲話「服咗自己」,阿Ben亦哭笑不得,場面相當爆笑。雖然最終出爐嘅「無蛋版蛋糕」變成扁平香蕉餅,不過一家人就毫不在意,Bowie更笑言係「集齊全家愛意的無蛋蛋糕」。![]()
家人亦紛紛向壽星仔袁氹氹派利是,收到利是後嘅小壽星雙手合十道謝,非常可愛。切蛋糕前一家四口又齊聲高唱生日歌一齊吹蠟燭。![]()
即將踏入3歲嘅哥哥 袁咕碌 全程都非常疼愛細佬更極具家教,唔止進食前有禮貌講出「我唔客氣啦」,更逐一向同桌嘅外公、外婆、父母同細佬逐一叫食飯,精靈乖巧亦獲網民大讚教導有方。而壽星仔袁氹氹試食後亦一臉滿足。
![]()