鄭融希臘度假有奇遇 遇可愛貓B網民呼籲收編

鄭融希臘度假有奇遇 遇可愛貓B網民呼籲收編

向來熱愛小動物嘅 鄭融Stephanie ,近日趁空檔遠赴希臘度假享受生活,不過呢次假期佢就有一個暖心奇遇 —— 佢喺當地旅遊期間意外「執到」一隻可愛嘅流浪貓BB,令佢嘅旅程增添意義同快樂!

鄭融喺社交平台分享嘅唔少片段及照片,佢喺帖文中寫道:「🇬🇷👶🏻喺希臘一個落緊雨嘅下午,拾到一隻响垃圾站徘徊,還病緊有感冒的貓BB~ 有經驗嘅朋友馬上去了買濕糧, 搣碎廁紙俾BB頂住做臨時貓廁所, 用菊花茶開水幫小貓抹眼睛抹面, 約獸醫 但係冇諗過要兩日後先有得睇醫生~」喺鄭融分享嘅照片所見,貓BB因為生病,對眼被黏液漿住,搞到佢眼神變得相當無辜,令本身熱愛小動物嘅鄭融瞬間被擊中,果斷出手拯救呢隻貓BB,細心照顧並帶去睇醫生:「第三日感恩BB精神都好返好多,食到個肚仔都變咗個乒乓波☺️ 好快有得睇醫生了☺️👶🏻💕 一個決定真係可以改寫生命❤️❤️❤️🙏🏻 BB 好鍾意你呀☺️ 你令我嘅旅程增添意義同快樂💞🙏🏻」

帖文一出,隨即引嚟大批圈中好友及網民留言大讚鄭融人美心善,紛紛表示:「貓BB好有福氣遇到你!」、「畫面好治癒」、「睇得出Stephanie真係好錫小動物」,更有唔少網民建議佢收編貓BB將佢帶返香港,令呢段「希臘奇緣」延續下去。