參加《中年好聲音4》再為外界認識嘅 可嵐 即將推出新歌《下半場的吶喊》,月初生日嘅佢日前舉行音樂會兼生日派對,邀請一班戰友包括 高少華(阿銀老師) 范子睿 鄭家聲 馬浩宜 同 東成 以及藝人朋友 關浩揚 可宜 同 馮凱琪 等出席。身為「中國香港女廚師協會」會董嘅壽星更請得一眾廚師好友同粉絲一齊開心歡度。
![]()
可嵐演唱多首歌曲後,亦首次演繹即將推出嘅新歌《下半場的吶喊》。佢更分享參加《中聲4》心路歷程,坦言過程中因家事曾抑鬱:「工人姐姐犯咗嚴重錯誤,令到細女皮膚二級灼傷,比賽後期再經歷業主要求喺一個月內搬走,加上比賽壓力,但喺屋企又要保持正面照顧仔女,比賽時面對外界又要保持笑容同儀態,嗰種抗衡心態的確形成一種無形壓力,令到自己好抑鬱。」
雖然壓力爆煲但佢仍覺有所得着:「有時候唔一定樣樣嘢都要OK,係可以同自己講『It is okay to say not okay』,亦都唔需要每一刻都表現得咁堅強,偶爾承認自己有唔開心、有壓力,都冇乜大不了。」![]()
與可嵐比賽時份屬隊友嘅范子睿亦驚嘆可嵐係超強女強人:「我親眼見佢處理大仔嘅問題,另一邊廂又要比賽,最記得有次佢喺車上不停講電話解決問題,我直頭感受到佢嗰種壓力!」![]()
可嵐仲特別感謝當時曾提供協助嘅東成:「我要多謝東成喺我趕住搬屋之際,為我提供海量嘅紅白藍袋!」之後兩人合唱《你是你本身的傳奇》。呢次生日派對亦由於佢嘅經歷,所以替「全康澄心基金會」籌款,希望大家關注身心靈健康,可嵐早前更為基金會慈善步行活動擔任活動大使,身體力行宣傳健康訊息。