玫瑰戰爭丨三小生惡搞MV獲正主讚揚 陳自瑤爆被傅嘉莉掌摑戲係真打

熱播台慶劇《玫瑰戰爭》劇中人物個個勾心鬥角,風光背後隱藏住一場復仇大計,劇集播出一星期,口碑同收視都創佳績。


陳豪喺劇中角色 陳雲生 深受旗下女藝人愛戴,個個都為咗佢爭風呷醋,搞到滿城風雨,阿Mo呢日受訪時,就好得戚咁話娛樂圈嘅大哥就係咁,仲話自己個角色係集郵嘅,連飾演 夏無雙 嘅 楊茜堯 都話要集對方郵呀。唔少觀眾都估陳豪個角色係終極big boss,不過阿Mo就叫大家唔使估喇,因為劇中仲有好多大家意想唔到嘅劇情。

myTV SUPER重溫《玫瑰戰爭》窺探娛圈秘聞

呢日宣傳活動上就播出 周嘉洛 、 張振朗 同 吳業坤 惡搞 林夏薇 、 傅嘉莉 同 姚子羚 MV嘅片花,搞到全場爆笑,林夏薇就話估唔到嘉洛扮得咁似,而 Kelly就話好欣賞佢哋三個好豁得出去,佢又指如果坤哥可以唔戴眼鏡效果就會更好;姚子羚就建議三位男士應該要化妝加戴埋長假髮。

陳自瑤 喺劇中一幕被Kelly兜巴星嘅場面,唔只觀眾睇到咬牙切齒,就連 鄺潔楹 都睇得相當投入,Yoyo話呢幕當時係真打,面上嘅紅印都係真實嘅,Yoyo話借位太假,要拍就拍真嘅,同時好在Kelly夠專業,十幾廿巴就拍好喇。

《玫瑰戰爭》星期一至五晚 20:30 翡翠台