一出道就一直效力同一公司嘅 謝霆鋒 同 容祖兒 ,獲邀加入成為英皇娛樂集團董事局成員,兩人已於星期二履新。而香港演藝圈中,藝人打工打到入董事局可謂極為罕見,今次兩位台柱直接由核心藝人一躍成為集團最高決策層,將同身為主席嘅 楊受成 合作多年嘅行政總裁 霍汶希 等制定公司長遠策略,被公司形容為係對兩人多年來功勞嘅最高肯定。
![]()
霆鋒同祖兒都係公司嘅「開國功臣」,霆鋒更係早於16歲就同楊受成結緣,自1999年展開合作關係,一同經歷無數風雨,感情深厚。近年霆鋒歌影同步發展,更成為香港影史上首位「金像獎演員獎項大滿貫」影帝,同步亦展現強大商業頭腦,創立品牌跨界飲食同生活品味。![]()
而比霆鋒輩份更加嘅「一姐」容祖兒,1998年就加入公司嘅佢同樣係元祖級重臣。多年來橫掃無數樂壇大獎、舉辦多場破紀錄個唱。2020年更當選香港「十大傑青」。老闆楊受成仲大讚祖兒係典型獅子山下「爭氣」故事,又指兩人多年來為公司吸金無數又省靚金漆招牌,如今升呢做「謝董」同「容董」實至名歸喎。![]()
對於兩位新任董事亦心情興奮,霆鋒話人生超過一半時間都喺公司度過,公司對佢意義早已超越工作本身,希望貢獻己力帶公司再創高峰;而祖兒就感謝伯樂楊受成厚愛,笑言會繼續以大師姐身份同大家擦靚公司招牌。
而多年來一直同兩人拍檔工作嘅經理人兼行政總裁Mani,就笑指昔日「仔女」如今同自己平起平坐開董事局會議,同兩人識於微時、情如家人,非常高興見證佢哋由藝人蛻變成為工作伙伴。