陳百祥 叻哥 日前接受訪問時,稱而家成個香港演藝圈資源萎縮,仲話TVB請唔起佢,對此呢日阿姐 汪明荃 為《萬千星輝賀台慶2026》進行綵排時,直言亂講嘢係叻哥講嘢嘅風格:「有幾多人信呢就唔知喇。」![]()
對於叻哥指TVB係一間細公司,阿姐淡定表示:「全個中國嚟講,我哋都係其中嘅一間公司,個規模或者而家內地有好多大過我哋,但我哋香港本土嘅,咁佢(指TVB)就係大公司㗎喇。」阿姐續指雖然放眼全中國,TVB只係其中一間電視台,但作為香港人,TVB就係代表本土公司、電視台。![]()
至於叻哥揚言TVB請唔起佢出騷,阿姐就指始終要畀機會新人:「請唔起呀?我哋有好多新人喎,你唔睇見年年有好多新㗎咩。最老資格都係我啦,哈哈,我覺得始終都要換新人嘅,我哋好努力培養好多,好似今晚好多司儀都係新人上嚟,Mayanne(麥美恩)嗰啲都做咗好多年,佢哋而家好多可以獨當一面啦,成為一個偶像當然唔係咁易,我都捱咗就嚟60年喇,咁大家努力囉。」![]()
問到會唔會打電話畀叻哥叫佢唔好亂講嘢?阿姐就幽默表示:「唔會啦,呢個係佢講嘢嘅風格,有幾多人信呢,就唔知喇。」令在場一眾傳媒發笑。![]()