萬千星輝賀台慶2026丨TVB台慶前夕拜神總綵排 汪明荃幽默評陳百祥「細公司」論

11月19號係TVB嘅59週年台慶大日子,全台藝員將傾力為觀眾帶嚟精彩節目。正式演出前嘅總綵排,無綫集團有限公司行政主席 許濤 帶領管理層及一眾藝員拜神,作為鎮台之寶嘅Liza姐 汪明荃 ,年年陪住公司過生日,佢都好開心可以見證「TVB與你行得更近、走得更遠」。

明年TVB就會踏入60周年,Liza姐指公司多年嚟送上源源不絕娛樂同作品影響市民,自己作為其中一員都感到好光榮,亦睇住公司創新同轉變。每到台慶,Liza姐都會特別感觸,因為又過一年,同埋希望有新創意。

今年台慶表演嘅壓軸嘉賓係許志安,Liza姐好開心見到安仔亦感到好驚喜,之前仲有去對方演唱會,讚安仔唱得好有感情。
 
對於陳百祥日前公開評論TVB係細公司,Liza姐就為呢件事分享個人睇法,佢話:「喺全中國嚟講,我哋係其中一間公司,好多規模都大過我哋。但喺香港本土就係大公司,作為香港人,我覺得呢個係代表我哋嘅本土電視公司,大公司,但喺全中國嚟講,係其中一個電視台。」

至於阿叻話TVB「請唔起一線藝人」,Liza姐就話公司年年都好多新人,喺公司最老資格就係佢自己,而大家都好努力去培養新人。被問會唔會打電話叫阿叻唔好亂講嘢,Liza姐話:「唔會啦,呢個係佢講嘢嘅風格吖嘛。咁有幾多人信呢,就唔知喇。」令大家都笑得好開心。

黃翠如 啱啱喺馬來西亞返香港,身體稍有不適,呢晚要戴住口罩現身。今年翠如同 洪永城 呢對最佳拍檔有份做台慶主持,呢次都係佢哋加入TVB咁多年以嚟,首次做台慶主持,所以Tony都話好期待。
 
今年台慶有好多精彩表演,除咗許志安會壓軸登場獻唱經典金曲,仲有向幕後同事致敬嘅環節。負責「炫舞女王」環節嘅 陳敏之、 陳煒、 傅嘉莉 經過多日排練,一切做好準備,佢哋預告屆時舞好睇、衫亦靚,而呢個部分係向所有梳化服同事致敬。 龔嘉欣 同 譚俊彥 兩位拍開動作戲之一就會有向動作組致敬環節,譚俊彥仲話好開心呢次台慶有大師兄羅嘉良回歸,叫大家一定要收睇節目。
 
講到Opening嘅歌舞表演,羅子溢、張曦雯都會跳埋一份。距離正式演出唔夠24小時,兩位竟然話完全未練過舞,不過好有信心可以完成表演。