方力申挑戰一日內游港澳兼開騷 方爸爸中風幸有孫女成康復靈丹妙藥

方力申即將喺今個星期六(21號)再次挑戰體能極限,展開35公里慈善港澳游,之後小方無縫接軌,抺乾身即刻衝去參與一個慈善音樂會,完全係鐵人級挑戰。

小方話最擔心條脷,長時間浸海水,令條脷變腫,七年前游港島後,條脷仲損咗,講嘢都會唔清楚。小方讚音樂會主辦方好好,本身預咗佢有跳舞部分,宜家未必需要跳,因為佢都擔心自己跳唔到。

小方呢次透露爸爸三個星期前突然中風,好在係冇爆血管清醒送醫,最差情況係半邊身郁唔到,目前已可以由護士扶住起身,慢慢行到幾步。小方仲話可愛小Isla絕對係爸爸嘅靈丹妙藥,每當爸爸見到孫女,把聲會變得有返精神,加上兩爺孫感情好好,Isla會爬向爺爺,同爺爺頭貼頭,小方睇到都覺得好感動。

小方話呢三個星期每一日都會同細佬去醫院探爸爸,希望鼓勵爸爸。雖然爸爸一開始態度難免消極,但每次見到Isla,方爸爸開始積極面對。而小方亦將媽媽嘅辛苦看在眼中,時刻提醒媽媽要注意身體。

下個月就係Isla一歲生日,小方都話時間過得好快,佢分享自己同家人有一個Daily Isla相冊,每日會放一張Isla嘅相入去,宜家睇返啲相都覺得一年變化好大,好唔捨得囡囡大得咁快,好掛住Isla細少少嘅時候。