柯雨霏新歌轉行陰暗慘情風 為拍MV刻意激減體重

柯雨霏(Ophelia)繼首支作品《直覺型美學》後,終於推出第二首歌曲《浸沒》。Ophelia喺一間荒廢嘅空間拍MV,仲要經歷被一堆線五花大綁,成個氛圍相當沉重。

Ophelia分享新歌有別於第一首歌嘅另類搖滾風。呢次新歌雖然關於失戀,不過係由自己提出。Ophelia話提分手前嘅過程,內心會好掙扎,最後喺痛苦當中,終於抽離出關係。導演為配合歌曲嘅陰霾感,所以特別揀選呢個場景。

Ophelia為營造出失戀落魄感覺刻意減肥,佢話之前同導演傾嘅時候口多多講咗,自己失戀嗰段時候都會食唔到嘢,所以導演要佢再瘦啲,令成個人睇落要再慘啲。問到瘦咗幾多?Ophelia就話足足瘦咗5kg,呢個體重簡直係人生中最輕嘅時候。