曹越夥Blue Jeans黃良昇跨代合唱 陳俞霏著貼身戰衣大叫救命

《中年好聲音》出身嘅歌手曹越,日前受邀參與多位管弦樂手同台演出,令佢直呼機會難逢。當晚最大亮點之一,就係曹越獲安排與80年代經典樂隊 Blue Jeans成員 黃良昇 跨代合作,喺管弦樂團伴奏下合唱經典金曲《豈有此理》。兩人在台上牽手互動、唱得投入,火花十足,為觀眾帶來耳目一新嘅新鮮感。

除咗同前輩破格合作,曹越嘅好姊妹 陳俞霏 及 劉曉昆 當晚亦有同場演出。三人難得合體,當然要獻唱佢哋嘅新歌《午夜Ring Ring》,邊唱邊跳成功炒熱全場氣氛。

不過,這場勁歌熱舞背後原來藏著「甜蜜嘅負擔」,因為佢哋均以貼身晚裝或連身裙「戰衣」上陣,演出前喺後台受訪時,陳俞霏忍唔住大叫「救命」,直言當晚最辛苦嘅並非唱歌跳舞,而係全程要「收肚」上陣:「其實成個音樂會嘅氣氛同歌曲我都覺得非常好,無論係邊一首都好,但係『收肚』呢樣嘢真係唔係人咁品,大家冇事真係唔好着咁貼身嘅衫!」一番真情流露引得身旁嘅曹越同劉曉昆忍唔住大笑。