電影泉攻略|傳羅拔唐尼將演出《IRON MAN 4》 DC影業大地震影視作品去留成迷丨EP234

今個星期繼續由 王鎮泉 為大家送上電影資訊,大家都知Robert Downey Jr.(羅拔·唐尼) 嚟緊就會飾演末日博士,而最近有一位出名爆料好準嘅影視記者Jeff Sneider就話,Robert 好大機會會演出《IRON MAN 4》,呢個消息一出,Iron Man嘅fans當然相當興奮啦。

而Jeff仲額外爆料,喺第四集Iron Man 前,Iron Man仲會喺另一部電影先行亮相。其實之前都有傳出過《復仇者聯盟6》嘅劇本流出,指Robert除咗演出末日博士外,同時仲會出演一個平行時空頹廢版嘅Tony Stark,正正就吻合Jeff爆料所講嘅。

本周電影新片速遞

《飢餓遊戲前傳:黎明反擊》:凱妮絲登場前嘅 24 年前,「飢餓遊戲」50週年祭出史上最殘酷新玩法,貢品翻倍至48人!16歲少年黑密契意外被選中,踏入仿如仙境、但其實步步致命嘅競技場。淪為都城必死棋子嘅佢,點樣以個人智慧破除死局,改寫整個施惠國命運嘅反抗之火呢?

《理智與感情》:父親離世、家道中落,性格迴異嘅兩姐妹,被迫搬離莊園,理智派姐姐Elinor 暗戀英俊而克制嘅Edward;熱情如火嘅妹妹Marianne 愛上莊園新主人John,而忽略咗深情嘅上校,面對愛情試煉同世俗眼光,兩姐妹憑住牢不可破嘅情誼,一齊走過低谷,希望迎嚟幸福曙光。

《每天再愛你一次》:經典荷里活愛情喜劇心動改編,Minnie首登大銀幕,戲中面對患有極罕見失憶症嘅亨利,對方記憶每日都會重置,瞓醒就會將女友當成陌路人。面對只有24小時嘅戀愛花期,露思奇招盡出,決心每日重新追求亨利,實行初戀無限loop!到底呢份愛情最終可否開花結果?

早前DC影業大地震,Skydance狠心炒咗兩位CEO James Gunn 同 Peter Safran,不過佢哋留低拍得七七八八嘅作品,仲有冇得留低呢,相信好多人都好想知道。由於Skydance始終負債緊800億美元,所以外間估計新超人續集,好大機會會完整保留。除咗會繼續見到超女外,大家仲可能見到傳聞中嘅新神奇女俠Adria Arjona。

香港嘅票房龍虎榜,截至11月18日中午,第1位《哥斯拉-0.0》 、第2位 《第四幕》、第3位《我阿爹想旅行》。