視帝 張振朗 同當紥小生花旦 劉穎鏇 周嘉洛 朱敏瀚 等,喺台慶夜上演咗連場驚險動作場面,向勞苦功高嘅武術指導致敬,當中唔少得眾多武師嘅協力先可以完成呢幕精彩畫面。好似振朗同嘉洛孭重飛嘅飛車情節,就由錢家班負責,拍攝時 錢嘉樂 親自落場指導,又貼心教佢哋點樣將動作做到最完美。
振朗同嘉洛多謝錢家班同嘉樂嘅幫忙,大家都係為台慶出心出力,又動用大陣仗嘅場面去完成拍攝。振朗本身都好鍾意揸電單車,做唔到可以用於今次特技演出上,感覺超爽,另一個場面,振朗就坐喺嘉洛隔離嘅副座,感受佢駕駛貨Van飄移,佢都有啲心驚膽跳。
而嘉洛就話從來冇諗過貨車都可以飄移,過程都好驚險,經過今次拍攝之後,兩人都更加尊敬武術指導,感受到原來平日拍戲時佢哋要做出嘅動作真係好高難度,而且要好有膽色先做到。