佘詩曼為媽媽舉行生日派對 抱緊佘媽高調示愛

佘詩曼為媽媽舉行生日派對 抱緊佘媽高調示愛

出名係圈中「孝順女」嘅視后 佘詩曼 Charmaine Sheh  ,近年主動減少離港工作,留多啲時間陪媽媽。佢19號晚就喺社交平台PO出多張為媽媽慶祝生日嘅溫馨合照,字裡行間流露出對媽媽滿滿嘅愛意,引嚟大批圈中好友及網民留言送上祝福。

喺阿佘分享嘅照片中所見,壽星女「佘媽」Lily 穿上亮橙色立領刺繡上衣,加上一頭銀白短髮,精神奕奕,氣質優雅出眾;而阿佘則於身後抱住佘媽,兩人齊齊對住鏡頭露出燦爛笑容。另外兩張相則為大家為Lily準備嘅生日蛋糕,一個為中式紅底金字嘅兩層生日蛋糕,蛋糕頂上有「76」及兩個小壽桃,而另一個則係簡單款嘅士多啤梨蛋糕。

阿佘喺帖文中感性寫道:「又到呢位靚女牛一喇~專登買咗件靚衫俾佢,睇吓佢今日幾sharp醒!見到你今日咁開心,我嘅開心指數到爆哂錶!都係嗰句啦:I love you🧡 I love you🧡 I love you🧡 (重要嘅事要講三次😛)P.S. 多謝各位貴賓嘅蒞臨,希望你哋食飽飽兼開心啦!」

Lily同阿佘喺圈中嘅人緣都極好,所以 上山詩鈉、周家怡、梁靖琪、李施嬅、蔣祖曼、張繼聰等圈中人,都喺帖文下留言,祝Lily生日快樂,身體健康呀。