方力申宣布追仔成功湊夠「好」字 套娃揭曉性別充滿驚喜

方力申宣布追仔成功湊夠「好」字 套娃揭曉性別充滿驚喜

方力申與太太 Maple(葉萱)於2025年結婚,2026年迎嚟大女 Isla(方愛嘉),今年11月20日公布太太於兩個月前懷孕,愛女Isla升呢做家姐喇!小方透露雖然爸爸因病未能去澳門支持其慈善游泳活動,但小方日前與媽媽、弟弟及女兒 Isla 一同喺醫院揭曉二胎性別,一家都好期待小生命降臨。


小方曾多次表示因身為家中長子,加上年紀漸長,希望盡快生第二胎,今次追仔成功,湊夠「好」字,小方心情非常興奮,今日喺社交平台分享喜悅,話「雖然爸爸病咗,聽日未能去澳門等我上水,但好感恩,日前喺醫院同我、媽媽同細佬,仲有Isla一齊用套娃嚟揭曉 Maple 下一胎嘅性別」,小方指呢個時刻對佢哋一家嚟講特別珍貴。


小方稱太太懷孕期間有好多未知之數,不過回到大女Isla出生嘅醫院,見到熟悉嘅醫護人員,令佢哋兩公婆都好安心,今次醫生為 Maple 安排咗幾個無創產前檢測,考慮到Maple身體情況之外,亦有考慮到男伴超過40歲嘅因素,安排檢查全面啲。


小方笑稱今次用套娃去揭曉,片中見佢哋經過層層拆開後,最內層掉出代表「男寶寶」嘅藍色小球,正式宣布第二胎為男嬰,成功湊成一個「好」字。小方一家感到既緊張又刺激,係一家人美滿嘅回憶,小方仲話而家「仔細老婆嫩,仲有爸爸媽媽要照顧」,小方叫大家放心,聽日佢喺慈善游泳活動將量力而為,「好好咁完成挑戰,再去唱歌仔,希望大家睇直播,同埋捐返少少支持基層及有特殊學習需要嘅小朋友及青少年喇,多謝晒」。


小方一向圈中人緣甚廣,唔少圈中老友送上祝福,杜德偉留言:「congrats bro!❤️❤️❤️女+子 = 好!」而好友劉浩龍就話:「一定係我哋嗰餐飯嗰啲大補湯🤣🤣🤣🤣恭喜晒!」