萬千星輝賀台慶|主席許濤預告公司大計 顏志恒奪終極大奬做大贏家

11月19日就係TVB嘅59周年台慶盛事,呢晚全台過百小生花旦傾巢而出,喺《萬千星輝賀台慶》傾力演出。集團行政主席許濤向全台藝員拋出震憾彈,透露明年公司將會喺可容納五萬人嘅啟德主場館開騷,以及將會有五套劇一齊開,令全台上下感到好鼓舞。

「撈家」羅嘉良闊別TVB 23年,呢晚強勢回歸,率領200位藝人載歌載舞,為演出打響頭炮,唱出經典劇集《難兄難弟》嘅歌曲。撈家話呢一段真係非常精彩同熱鬧,而且大家要跳得齊整都好唔易。撈家喺綵排前,感到腳底麻痺同需要戴腰封,雖然On Show時都有啲唔舒服,不過佢就話最緊要觀眾睇唔出就得喇!

至於壓軸重頭戲,就由出道40年嘅許志安擔大旗演出。狀態大勇嘅安仔,一連唱出多首經典金曲,台下一眾藝員更揮動螢光棒,十足十睇演唱會一樣。

安仔對上一次參與台慶,已經係1994年嘅事,當年安仔仲有份為阿姐伴舞《熱咖啡》,佢都話呢段回憶令人深刻。呢晚佢同阿姐相隔30幾年再喺台慶夜世紀重逢,除咗嚟個窩心擁抱之外,阿姐喺台上更為安仔送上鼓勵,表示呢段路行嚟唔易,而安仔謙虛回應:「我會努力。」

安仔呢晚難得現身,大家都少不免會將焦點放喺佢同馬國明碰頭呢件事上,不過安仔就話唔感到尷尬,件事亦過咗好耐,一切都順其自然:「以前錯過痛過沉澱過改過,而家最重要係做好自己嘅工作,對得住家庭就好足夠,要向前望。」

每年台慶大抽獎均係萬眾期待嘅高潮環節,但幸運兒之一嘅黃劍文,竟然因為去買雞髀而走寶,結果由另一位幸運兒肥媽補上,白白望住十萬大獎同自己擦身而過,Kimman當刻嘅心情灰到爆,唔少人都戥佢好唔抵,車婉婉都有安慰Kimman。至於中聲家族嘅陳芊芸就話,大家幫Kimman改咗個名叫「雞髀文」。作為另一位幸運兒嘅肥媽都話多謝Kimman,但係佢都話打算拎筆錢出嚟同中聲家族食咗佢。

同係中聲Family嘅顏志恒就喺「開口中」環節中,一人獨攬45萬信用卡免找數簽賬額,成為終極大抽獎嘅大贏家。Benson開心話之前同大奬擦身而過,個波一爆就覺得「到我喇」,而佢第一個諗起嘅就係離世冇耐嘅媽媽。因為媽媽都係11月19號生日,好似係媽媽喺天上保佑自己。

另外,由陳煒、姚子羚、傅嘉莉及陳敏之四大索女率領30位女藝員表演嘅歌舞環節,一樣令觀眾熱血沸騰,演出後,大家成功解鎖,開心到相擁落淚。煒哥就話大家排咗超過十日亦踩咗無數次台,呢日表演係最好嘅。子羚就覺得大家可以做到真係好唔容易,大家都唔係跳舞好叻嘅人,亦經歷咗好多錯敗。

中聲家族呢晚亦嚟個實力大曬冷,肥媽帶領幾屆中聲唱將嚟個crossover,黃博同譚輝智更罕有上演火辣貼身舞。輝智事後澄清自己冇掂到博博大髀,所以博博老公唔使擔心。

除咗歌舞演出之外,張振朗、周嘉洛、朱敏瀚同劉穎鏇,聯同錢家班,展開一場高難度嘅動作及飛車演出,大顯身手,並藉此向一眾幕後特技英雄致敬。

何廣沛參與完台慶盛事後,佢又要開始為下個月嘅人生大事好好做準備,佢話放鬆心情嘅部分就要交俾「兄弟」陳曉華,Hera都話自己俾足情緒價值Matthew,可以紓緩緊張。