王菲三母女破天荒合唱 紀念嫣然基金成立廿周年

王菲三母女破天荒合唱 紀念嫣然基金成立廿周年

近日因《季候風》再度成為焦點嘅 王菲,為慶祝佢為幼女 李嫣 因兔唇而成立嘅嫣然天使基金成立20周年,近日推出全新歌曲,同大女 竇靖童 及幼女 李嫣 合唱《愛笑的天使》。今次係三母女首度正式合作,而一向低調嘅王菲更於MV末段,公開一張早年抱住初生李嫣嘅舊照,加上配合20年來基金嘅慈善工作點滴,觸動無數網民。


2009年推出嘅《愛笑的天使》由王菲親自填詞、陳輝陽作曲,而今次曝光嘅20周年合唱版MV中,由轉眼已經20歲嘅李嫣,以清澈聲線揭開序幕,加上竇靖童獨特磁性聲線同媽咪王菲空標誌性嘅歌聲,三母女聲線完美融合,MV更特由竇靖童同父異母嘅妹妹 竇穎 擔任配唱製作人,一家人因音樂而凝聚。

MV中串連基金自2006年成立至今嘅工作,由首位接受捐助嘅北京男童,到其後深入偏遠地區支援嘅「嫣然天使之旅」,到近年舉辦嘅慈善夏令營,記錄下20年來先後獲5000多名醫療人員、近9000名志願人士以及上千萬人次捐款,總共為有需要病童完成17000多次免費手術。

嫣然天使基金成立背後,承載住王菲同前夫李亞鵬嘅往事。兩人2003年相戀、2005年低調結婚,隔年5月迎來愛女李嫣。但李嫣出生時患有先天性唇腭裂,夫婦倆陪伴女兒赴美接受治療過程中,體會到基層家庭面病症嘅無助與艱辛,遂決定共同發起成立「嫣然天使基金」,協助內地貧困兔唇兒童獲得免費醫療救助。

雖然王菲與李亞鵬2013年宣布離婚,但兩人其後仍多次為基金同女兒的成長合體。離婚後兩人各自展開新生活,王菲重拾低調生活步調,與謝霆鋒世紀復合後感情穩定,只偶爾為電影或大型晚會獻聲。

而李亞鵬就轉戰商界與直播領域,2022年與比佢年輕19歲嘅模特兒海哈金喜再婚並育有一女,近年雖然不時傳出債務問題,不過佢就仍然親自帶領醫療團隊出訪高原同偏遠山區參與義診。