向來熱愛跑步嘅「發哥」 周潤發 今年再度身體力行,率領一眾跑友挑戰20公里「毅行者」賽程。「三哥」苗僑偉與「三嫂」戚美珍夫婦更驚喜現身位於屯門嘅終點,兩人專程駕車趕到現場迎接發哥衝線。
![]()
三哥一到場即時於路邊搵定最佳攝影位置,蹲下舉機捕捉發哥衝線一刻。受訪時仲笑言自己過往試過接機、接船同接車,但「接跑步都係第一次」。佢透露今日其實同發哥「兵分兩路」各自帶隊做運動:「發哥就帶咗一班高手跑毅行20公里,我就另一班初跑者跑咗7公里,啱啱跑完就順便過嚟接埋佢哋,同大家打氣加油!」仲話之後就會大隊齊齊去搵食呀。
![]()
發哥率領 黃浩然 蔡一智 等跑友,以6小時23分順利完賽,發哥身穿印有「發」字嘅隊服,與一眾跑友並肩跑向終點。衝線一刻發哥貼心停下腳步等待所有隊友會合,全隊人齊齊高舉雙手一同衝過終點線,完賽後嘅發哥狀態極佳、面不改容,與浩然同阿智齊齊舉起「V」字手勢合照,又親民地同參賽者、市民以及傳媒揮手打招呼,現場氣氛相當熱鬧歡樂。
![]()
![]()