龔慈恩回應怒燒前夫劇集影帶 首演舞台劇獲阿女做軍師

龔慈恩 盧鎮業 盧慧敏 呢日為舞台劇進行綵排,雖然龔姐已經係老戲骨,不過做舞台劇都係第一次,令佢心情緊張,因為排練後先知同拍電視劇、電影好唔同,無論方位、節奏、企位都要重新學習,整個畫面要好豐富,幸好事前有阿女同導演以及其他演員幫助,先令龔姐演出過程流暢,仲覺得呢個新嘗試幾好玩。


龔姐前夫 林煒 昔日拍嘅連串愛情台劇近日喺社交平台翻Hit,林煒更被大家封為「上古許光漢」,亦有人搵到一段節目訪問,話龔姐怒燒林煒嘅劇集錄影帶。龔姐強調燒就一定冇,自己肯定唔會咁做,但當垃圾掉咗就有可能,畢竟都廿幾年前嘅事,唔記得太清楚,當時應該係啲宣傳嚟,龔姐亦都大方祝福林煒。

小野同Amy喺劇中飾演新婚夫妻,仲會有親嘴場面,兩位坦言無預想過會否尷尬,但小野話平日拍嘴戲都至少有幾十人在場,所以冇特別想太多,二人會投入演出。