方力申 繼2019年環香港島45公里慈善游壯舉後,星期六再為慈善挑戰橫渡港澳慈善游 ,方力申最後以8小時37分完成,唔止刷新橫渡港澳最快紀錄,更獲健力士世界紀錄認證為「香港至澳門游泳用時最短男性。完成35公里馬拉松式游水後,佢更即時緊接於澳門當地出席慈善演唱會,善心過人。
![]()
小方昨清晨8時53分於大嶼山雞翼角開始呢次旅程,橫渡港澳公海海域,到5時30分順利抵達終點:澳門黑沙海灘。呢次壯舉原定籌款目標係600萬港元,不過到小方完成一刻,善款已突破1000萬港幣。善款將全數撥捐「凝動香港體育基金」與「澳門特殊奧運會」,支持基層同特殊教育需要兒童參與體育培訓。![]()
小方挑戰期間,沿途一直有專業領航船、工作船同獨木舟護航,而親友亦一直於船上守候應援。衝線一刻,小方妻女同親友已於黑沙海灘等候迎接,小方仲因愛女Isla下月迎接一歲生日,決定以身作則完成極限挑戰,為愛女送上別具意義嘅成長禮物,實踐「為下一代游,叫未來」承諾。![]()
雖然連續游水對抗海流整日,不過小方完成35公里渡海泳後,只簡單休息就加入由佢發起嘅《浪接.浪》港澳群星慈善音樂會,與多名港澳藝人一齊為慈善獻唱。演唱會開始前,小方亦分享呢次海上征途嘅難忘時刻同心路歷程。
佢直指旅程中,曾有數次放棄念頭——體力透支、風浪不定、肌肉痠痛,一直考驗意志。但一諗起背後有無數市民、贊助商同團隊支持,佢就同自己講:「不能停,因為呢35公里唔只係我一個人嘅事。」![]()
佢仲指挑戰最深刻並非衝線一刻,而係沿途感受到香港人嘅溫暖——有人喺岸邊揮手打氣,有人喺直播留言區留言支持,甚至有小學生親手寫字為佢加油。都成為佢堅持到底嘅最大動力。方力申希望透過呢次經歷鼓勵更多年輕人:「無論你哋面對咩困難,請記住,大海再大,都有岸;風浪再高,都會過。只要堅持,就一定可以破浪前行。」![]()
演唱會所有門票同贊助收入,不扣除任何成本下將全數捐出至凝動香港體育基金、澳門弱智人士家長協進會、澳門同善堂、澳門明愛、人人流浪狗澳門義工團、Anima澳門愛護動物協會,以全力支援上述社福團體及其服務對象。