由 宋宛穎 莊子璇 倪嘉雯 倪樂琳 喬美莎 同 盧映彤 組成嘅 MYNT魔音女團 近日衝出香港,獲邀飛往韓國江原道,出席亞洲時尚界盛事《2026 Asia Model Festival》(AMF FESTA)頒獎典禮,更獲大會頒發「Asia Special Award」(亞洲特別獎)殊榮。
![]()
六位成員星期六清晨就現身機場準備出發前往韓國,呢日咁啱係 倪嘉雯 生日正日,五位隊友同一眾到場送機Fans,即場以生日蛋糕同合唱生日歌,為佢送上劃年第一個生日驚喜。Carmen坦言係人生首次咁早慶祝,加上正日得到一眾好姊妹同Fans陪伴覺得非常幸福,更即場同大家分甘同味,氣氛溫馨又熱鬧。![]()
而當晚於韓國江原道舉行嘅頒獎典禮上,MYNT六位成員換上一身型格十足嘅紅黑皮草露腰熱褲戰衣登場。接過獎座後,隊長 宋宛穎 與「韓文擔當」莊子璇,分別以流利英、韓語向現場嘉賓與大會致謝,贏得台下熱烈掌聲。
領獎後,MYNT隨即於舞台上為韓國觀眾帶來勁歌熱舞,除演繹由韓國團隊負責作曲同編舞嘅全新團歌《Tic Toc》外,又現場表演出道曲《Turn My Magic On》,成功炒熱全場氣氛。![]()
除出席頒獎典禮領獎外,MYNT今次韓國之行亦非常充實,成員們亦會於當地參與唔同活動。由於當地天氣嚴寒且有可能落雪,從未見過雪嘅喬美莎直指心情興奮,而Carmen更指獲粉絲送上數十個暖包「護體」。而酒店分配方面,隊長同師姐們就搞笑下達「禁令」,嚴禁團中年齡最小、最活躍嘅喬美莎與盧映彤同房,笑言怕兩人玩通宵唔瞓覺,足見成員們私下感情極佳、默契十足。