方力申靠意志完成港澳渡海泳 無縫接力出席音樂會又唱又跳

方力申 挑戰體力極限,出戰35公里港澳慈善渡海泳,最終用咗8小時37分零24秒完成壯舉,一舉刷近港澳橫渡最快紀錄,更正式獲健力士世界紀錄認證為「香港至澳門游泳用時最短(男性)」,更成功突破港幣1000萬元總籌款目標。


一眾親友喺澳門黑沙海灘等候,小方上岸後全場報以掌聲歡迎,方媽媽、太太以及囡囡Isla更上前迎接,Isla同小方更頭貼頭場面温馨。

完成呢次壯舉後,小方雖然體能消耗到極限,但佢未有停下腳步,喺同日傍晚無縫接力,出席一個群星音樂會,小方更同胡定欣一齊合唱《好心好報》並聯同劉浩龍、側田、小肥一齊合唱《決戰二世祖》。

小方話佢其實演出時一直感到頭赤赤、吞口水亦都好痛,但佢都好開心可以順利完成演出,講返呢次渡海泳,小方話佢游到中途突然水温急降,全靠意志力撐過去,小方話:「因為咁多人睇緊直播,唔衰得,又有人等緊我,游緊嗰陣一路幻想住上岸時,見到阿媽、太太同囡囡,所以只可以同自己講,只要你繼續划手,就會同岸距離近咗。」對於攞到健力士世界紀錄,小方就話非常開心,但佢最希望反而係人哋記得佢為咗慈善而游。

小方又透露早前中風嘅方爸爸亦喺醫院留意住直播,佢指爸爸而家嘅康復進度理想,樂觀嘅話可以恢復八成,佢仲話爸爸已經知道自己就快再做爺爺,仲好期待想知BB性別。

被問到兩年抱兩係咪好勤力?小方話呢個係計劃之內,加上自己年紀都唔細,至於點樣獎勵太太?小方表示太太唔需要獎勵,只係希望佢唔做咁多嘢,多啲陪伴屋企。對於第二胎係生仔,小方都話覺得好意外,但同樣佢亦開始擔心男仔同女仔喺管教方面會有唔同,所以佢都話要向其他人取下經先得。