疫情纏港幾年，唔止街冇得去，飯冇得食、戲冇得睇，更多人齊集嘅演唱會更加係被禁止嘅頭號目標。經過年初嘅大爆發之後，5月起政府開始局部開放表演場地，一向愛睇騷嘅香港人終於可以再次入場喇。

張敬軒率先為先後幾次受影響嘅個唱補場，而陳奕迅亦都喺聖誕同跨年期間，展開原定2019年舉辦，亦係佢事隔9年之後再次喺紅館舉辦嘅演唱會。而修哥胡楓亦都再打破自己創立嘅紀錄，以90之齡成為喺紅館開騷最年長嘅歌手。

除咗佢哋之外，紅館同其他場地亦都接近個個星期有騷開，餓足幾年騷嘅大家荷包大出血之餘，首先都要搶到飛先得嘅。 鄭欣宜、關心妍、衛蘭、馮允謙、林家謙、周國賢、草蜢、鄭伊健、黎明、楊千嬅、林子祥都先後喺唔同場地開騷，而韓國男團Super Junior更成為疫後首隊訪港開騷嘅外國組合。

可惜喺表演業似乎步出寒冬之際，7月MIRROR舉行首次紅館個唱時，懸掛喺舞台上方嘅巨型屏幕因為鋼索斷裂而墜地，事故造成幾位舞蹈員受傷，當中包括仍然臥床留醫嘅李啟言。事故令全世界對表演之都發生嘅嚴重意外嘩然，喺外界多番關注之下，警方早前拘捕涉嫌虛報數據嘅各主辦同制作單位五人。有舞者事後聯署發聲明，希望業界更為關注表演者安全。