「發哥」周潤發自2018年演《無雙》之後，相隔5年終於再喺香港大銀幕出現，對於一眾影迷引頸以待，周潤發、袁詠儀主演嘅電影《別叫我賭神》即將6月29號上映，其實套戲早喺2019年完成拍攝，當時「智叔」廖啟智亦有參與拍攝。

「發哥」周潤發自2018年演《無雙》之後，相隔5年終於再喺香港大銀幕。

由潘耀明導演、莊文強編劇嘅《別叫我賭神》，周潤發呢次率領袁詠儀、方中信及柯煒林等，帶出一套溫情窩心嘅港產片，發哥曾演賭神系列，今次佢嘅角色「吹水輝」係一名吊兒郎當嘅賭場常客，名副其實係十賭九輸嘅落魄中佬，完全顛覆以前發哥扮演嘅賭神霸氣形象

周潤發呢次率領袁詠儀、方中信及柯煒林等，帶出一套溫情窩心嘅港產片。

戲中講吹水輝與好友花叔（廖啟智飾）、肥狗（方中信飾）一齊經營懷舊髮廊，可惜生意淡薄，賺到嘅錢都唔夠還賭債，前女友李夕（袁詠儀飾）突然出現，要求吹水輝照顧兒子李陽（柯煒林飾）一個月，願意畀報酬佢應急還債，吹水輝見錢眼開即敷衍答應，後來發覺李陽有自閉症，本以為一心賺快錢，點知被李陽搞到束手無策，父子關係日趨緊繃，發哥喺戲中極罕長髮造型、寒酸打扮，配合潦倒嘅角色設定，二人喺相處當中增進父子情，令吹水輝找到自己嘅人生目標，唔再頹廢過活！故事發人深省，吹水輝發現兒子天賦，陪伴阿仔展翅追夢。

其實套戲早喺2019年完成拍攝，當時「智叔」廖啟智亦有參與拍攝。

《別叫我賭神》為配合吹水輝呢個賭場常客人設，劇組移師去澳門拍攝，發哥、袁詠儀與一眾演技派演員方中信、廖啟智、柯煒林、安志杰、黃德斌、白只、蔡一智及盧慧敏等，喺澳門拍足一個月。