數百人面試《中年好聲音》 熱鬧面試過程現場直播

日前舉行首輪面試嘅《中年好聲音》反應熱烈，喺截止報名前就有唔少有志參賽者，喺8號一早嚟到TVB排隊面試喇。同上次一樣，唔少參加者都有一身好功夫，亦有部份參加者曾經係過往比賽常客嚟，到底佢哋有冇機會今次再圓舞台夢，一陣就記得留意「東張+」現場直播佢哋嘅表現喇。

唔少人生活穩定之後再去追尋夢想，呢日就有曾參加新秀嘅、亦有一家大細陪Daddy到場，亦有2010全球華人新秀歌唱大賽，獲得網上最具人氣獎嘅Venus謝穎，呢日亦都再次挑戰自己上陣，同JW老友鬼鬼嘅佢，仲獲大力支持同教路呀。

呢日仲有一位係前輩加舊同事，佢就係「木偶哥」林師傑嘅爸爸林道權，佢除咗係今屆參加者之外，仲係1982年藝訓班畢業學員，加上今年係佢同太太結婚40周年，所以就決定再一圓夢想作紀念喇。呢日亦有一位視障人士Romeo參加，佢就認為雖然生活上佢哋略有唔方便，不過想證明喺其他事上面同健全人士一樣有競爭力呀。佢仲係作曲及作詞家協會成員嚟呀。

現職歌唱老師嘅Jeffery同樣曾經係TVB同事，佢就話係經學生提議參加，擔心過一輪之後佢就決定都係要挑戰自己，拋低心中嘅牽絆呀。記得一陣間留意住「東張+」現場直播面試嘅情況喇。