神秘麥田圖隱含COVID-19疫苗線索？ 揭外星人27年後給人類回信

鄭子誠同陸永主持《邊度都有外星人》噚晚播出嗰集再請來「外星文明研究者」Tecki擔任嘉賓，佢自言目睹過200多架次不明飛行物體，又話科學家Tesla係來自金星嘅生物，成為不少觀眾茶餘飯後話題。

呢集主題講麥田圈，即係一大片麥田，一晚之間忽然出現對稱圖案，曾出現喺英國、加拿大、法國同意大利等地，最大有300米，好多時喺古蹟附近出現，中國近年都有報告，3年前喺青海鹽湖出現麥田圈，原來有玄機，節目講麥田圈係二進制符號，係外星人畀地球人嘅訊息，畀人知有外星文明，另一啲喺古蹟出現，係要維護附近能量網格嘅磁場。

有傳2020年5月英國出現一幅圖案，Tecki表示係外星人提供畀人類COVID-19嘅解藥，看似平平無奇嘅圖案，原來隱藏病毒同製造疫苗訊息，牽涉SP8胺基酸物質，一種可以對付COVID-19嘅棘突蛋白（spike protein）；所謂有圖有真相，今晚節目更播出2009年一段一分鐘短片，一名英國人喺當地牛奶山，影到疑似兩架UFO發光圓點，光點喺麥田上空盤旋，原本平整嘅麥田喺一分鐘內出現一幅清晰圖案，據聞係預示9大行星翌年嘅軌跡，另外，1974年有科學家將有關地球訊息發送上太空，估唔到事隔27年終於收到外星人回應。