自認時間管理大師王菀之籲放低工作享天倫樂

娛樂新聞

2022-11-16 08:30已更新：2022-11-16 18:24

現代人成日無事忙，唔少人都忽略咗抽間同親友好好相處，不過經常周身唔同Project嘅王菀之就話事在人為，只要好好安排時間，唔係淨係排住做嘢，一定要好好搵時間陪吓家人朋友呀。

雖然係咁講，不過Ivana呢日一被問到有冇抽時間陪老公，佢就非常怕醜喇，而早前搞完舞台表演又拍戲嘅佢，仲有時間創立自己嘅咖啡廳豆品牌，都真係要讚佢分身有術呀。自細已經有開店夢想嘅佢，就話因為成本太高，所以暫時唔會開實體店喇。

Tyson Yoshi揚言MV選角自主唔使問女友澄清無寸周董演唱會欠新意

娛樂新聞

2023-03-16 17:30

Tyson Yoshi呢日現身一間美妝店分享護膚心得，出席完活動之後就要即刻啟程去東京拍攝MV。自言次次都落重本拍MV嘅Tyson，話呢次女朋友Christy因為要留喺香港幫佢睇住健身室嘅生意，所以今次未能同行，問到佢有冇出糧畀女友？求生意欲MAX嘅Tyson即話：「梗係有啦大佬！免費死人㗎！」雖然講到咁，但Tyson話MV選角嗰啲都係佢話事嘅，所以即使MV女主角係性格女仔都OK。

講到香港演唱會，Tyson就話要睇下年底自己第三隻碟嘅反應係點先，仲話因為自己嚟緊都仲有好多騷，所以叫觀眾唔使擔心見佢唔到呀。對於早前喺直播講取消原定喺7月嘅演唱會，被指言論係暗指周杰倫演唱會冇新意，呢日佢都有澄清，仲話學識以後講嘢要小心，至於到時會唔會去睇周杰倫喺香港嘅演唱會？Tyson就話如果時間許可都會想去睇學下嘢呀！