一向孝順媽咪嘅佘詩曼，近年雖然經常工作經常唔喺香港，不過近日佢就為媽咪生日設宴款待大班親友，壽星佘媽媽一頭白髮滿場飛同各位好友合照留念，當中包括唔少圈中人，好似名伶羅艷卿、古天樂媽咪、吳麗珠、譚倩紅、周嘉怡同資深傳媒人汪曼玲等都係坐上客。佘媽媽早年曾任DJ，同囡囡一樣相識滿天下，難怪咁多好友到場為佢慶祝喇。

出名孝順嘅阿佘為媽咪辦壽宴

佘媽媽曾任電台DJ，所以相識滿天下
阿佘同媽咪好似餅印一樣，呢日就齊齊以大紅打扮現身壽宴，除咗準備蛋糕壽桃為媽咪賀壽，又應大家要求親吻媽咪呀。

名伶羅艷卿同資深傳媒人汪曼玲都有到賀

即將重返娘家TVB開拍新劇《News新聞女王》嘅 佘詩曼 雖然演出角色無數，仲貴為視后，不過要喺新劇扮演嚴肅認真嘅女主播，阿佘就話有一定難度喎。佢話平時演戲唔應該望鏡，而主播就反而要望鏡頭自然讀新聞，所以一早就自備攝影機喺屋企練習，準備忘月正式開工喇。

自《誇世代》再次為TVB演出嘅佢，又話今次係因為有好劇本而首肯，仲要多謝 陳山聰 特登要求公司安排自己參與演出，同阿佘再一次合作呀。阿佘又透露之後就會進軍幕後，化身為製作人參與製作劇集，唔知又會係咩主題嘅故事呢？

同樣現身活動嘅仲有 朱紫嬈 同 Kelly Jackie ，新年期間罕有冇開Live嘅KJ，呢日就話自己因為聲線出問題而好耐冇同網友見面，於是就休息咗一段時間，所以Fans唔使擔心喇。而Khloe就正籌備推出新歌，仲計劃自己參與創作呀。