CP訓練營｜A0男阿Yeung成大威脅？ 兩Pair潛質CP情路遇沙石

結合戲劇訓練而一班參加者戀情又疑幻似真嘅《CP訓練營》，今個星期就會播出結局篇。今晚Kyle、Gillian、Michelle同Jaxson將會紛紛以泳裝放題亮相外，而22號晚一眾CP仲會上演真錫咀咀戲碼。

經過三星期相處同Pair Up之後，潛質CP其實已經呼之欲出，當中關注度最高嘅兩Pair分別係 Gillian＋Kyle，仲有Michelle＋Jaxson。今晚一集佢哋兩對CP將會遇上考驗，Big Boss仲竟然係A0男阿 Yeung！上次講到阿Yeung同Jaxson不約而同約Michelle單對單Dating，Michelle更大方地分別答應佢哋兩個嘅邀請，搞到成個「嬲」字出哂嚟嘅局面。

明顯對 Michelle情根早種嘅Jaxson，對Michelle同時答允同「程咬金」阿Yeung約會擺明打翻醋埕：「佢冇拒絕到，我唔係好鍾意，原來我同阿Yeung一樣地位」，約會時仲一度黑面。相反阿Yeung對 Michelle就盡獻殷勤，又不斷喺約會前後送上小禮物氹女方開心，令Jaxson同 Michelle關係更顯危危乎。

阿Yeung除咗令MJ戀現暗湧之外，又同時令KG戀慘遇沙石。事緣阿Yeung同Gillian喺房間深情對話時，唔止令Gillian落淚，之後再加多個愛的抱抱。而全程看在眼裏嘅Kyle，頓時戰意爆升，除咗緊張Gillian對阿Yeung嘅觀感之外，約會時又直認在意女方同阿Yeung嘅關係，仲大數自己嘅「呷醋事件簿」，成功吸引Gillian注意，亦向Kyle剖白對阿Yeung嘅睇法，Kyle聽完仲即刻打蛇隨棍上：「我覺得我唔了解你，亦因為呢種唔了解，所以我一直揀你，呢種距離 感對我嚟講好吸引。」

Kyle邊講邊奉上情深眼神，令Gillian甜在心頭。不過又唔代表KG關係定過抬油喎，因為喺 J2 社交平台發放嘅最新絕密片段中，Zaza原來曾偷偷直踩Kyle常去嘅Gym，以學做Gym為名高調「爭仔」，喺佢哋嘻嘻哈哈期間，「正印」Gillian突破殺出，仲全程嬲爆爆兼眼睥睥。眼見勢色唔對嘅 Kyle問Gillian係咪嬲豬時，Gillian仲大叫：「㷫囉！」花生指數爆燈，令人更期待呢段 3＋1戀嘅後續發展。

《CP訓練營》多戀事邊Pair成功？記得留意星期一至五晚 22:30 J2(82台) 喇