拆解Speed Dating參與需知 出席打扮對答全攻略

《J2ers:不正常愛情研究所》今集會同大家一齊探討近年結婚異性嘅大熱方式之一:「Speed Dating」(快速約會), 仲邀請到快速約會公司創辦人Yubi擔任嘉賓。 各位主持配合今集主題,都以心水約會戰衣現身,再接受嘉賓Yubi品評。

佢首先大讚Jojo嘅露腰小背心、牛仔短裙配合凸顯女性線條,完全值得加分、而Karen嘅露肩裝,食飯時候可以吸引到男士注意,而Karen揀露肩長裙充滿機心,喺節目入面會詳細解釋。至於Susuca選擇嘅黑色係百搭色調,仲令佢有一份神秘感,不過Yub就提大家著暖色系衣服應約,又提醒男士們話︰「初相識時間,頭三次同女仔約會,最好著有領、有袖恤衫。」

Alan講到已單身3年,覺得Speed Dating概念啱晒自己,佢話︰「其實我冇試過, 不過idea好吸引。可以輪流同唔同女仔傾計,選擇性多咗。好open mind表明我嚟呢度就係搵女朋友,機率又大咗。有考慮過有興趣嘅。」心儀文靜但又會參加唔同活動女性嘅佢,仲話擇偶要求自律性強:「可以管到我,因為自己比較懶」。 

而節目開始之前,主持又要填寫一份參加「快速約會」嘅表格,除咗年齡、身高、 收入、自置或租住物業等基本資料之外。仲會問埋「有冇生育打算」、「有冇信心告別單身」同「覺得自己外表如何」等問題。Yubi就話係為分析申請者性格方便配對喇,佢話由答案可以睇出Jojo 同Susuca兩人有好高能量、鍾意玩而且可以一心幾用, 正係大部份男士都喜歡嘅類型。以九型人格分析,佢哋係屬於做人有目標同自信嘅七型人格(The Socializer)。

節目中Yubi亦提到唔少有趣個案,好似醫生同約會對象嘅話題竟然係「屎尿」、A0女仔被「浪漫偶像劇洗腦」以為世界上充滿好多白馬王子,更多詳細內容,就要留意聽晚播出嘅《J2ers︰不正常愛情研究所》喇。

 相關推薦