林敏驄、郭柏姸、陳瀅、劉佩玥、陳山聰、蔣家旻、張艾嘉、古天樂、鄭欣宜、炎明熹（Gigi）、姚焯菲（Chantel）、鍾柔美（Yumi）及詹天文（Windy）等呢日現身一個網絡平台舉辦嘅搜尋人氣大獎頒獎禮，張艾嘉獲得亞洲人氣演員獎，張艾嘉亦負責頒「年度風雲人物」獎畀古仔。

由4位「聲夢學員」組成嘅人氣女團「After Class」獲得樂壇新勢力組合獎，四女在台上獻唱《要為今日回憶》，當中Gigi同Chantel同時奪得樂壇新勢力獎，Chantel指佢哋首次拎組合獎，又有唱第一首派台歌，留下美好回憶，Windy覺得好開心、好榮幸，Yumi則感謝fans們一直以來嘅支持。

Gigi呢日拎埋「人氣票后」走勢強勁，Gigi曾表明對拍劇有興趣，近日被安排到《愛‧回家》劇組攞取經驗兼加強演技，被問到會唔會After Class一齊拍《愛‧回家》，Gigi笑指呢個冇諗過，希望有呢個機會，Gigi稱喺《愛‧回家》拍攝非常開心，好似融入咗大家庭，同場演員好nice，大家都有說有笑，而Chantel亦希望與Gigi、Yumi及Windy一齊拍《愛‧回家》，因為佢由細到大都好鍾意《愛‧回家》。

曾比特早前與Gigi參加《聲生不息》，亦得到樂壇新勢力獎，佢哋好感激fans支持，Gigi有時會擔心表演出錯或者演出唔夠好，一度擔心fans失望，幸運一直有fans鼓勵，而曾比特笑言拎到呢個「搜尋獎」有8成係自己貢獻出嚟：「我經常搜尋『曾比特』睇吓後面係寫咩，最多人講係頭髮，同埋『真假』，有見過『曾比特 真名藝名』，真嘅OK。」

林敏驄同郭柏姸憑《下流上車族》齊齊得獎，人氣繼續攀升，林敏驄自言對台慶頒獎禮嘅獎項完全冇信心：「呢個係好友叫我幫手，二話不說幫忙，幫完拎到好成績，我又冇令人丟臉，就拍拍屁股走人。」林敏驄更笑指自己同郭柏姸係《下流上車族》倖存者。

今次《美麗戰場》大豐收，演員期待台慶再下一城，獲得人氣CP獎、人氣電視女角色、人氣電視劇集等，監製葉念琛率領演員現身，陳瀅提議葉念琛請眾人去出埠旅行，陳山聰感謝網民喜愛，希望1月8號再下一城！