每到年底就係娛樂圈各式頒獎禮舉辦嘅日子，亦係一眾藝人證明自己過往一年努力嘅時候。一間娛樂公司舉行嘅頒獎禮10號舉行，當中 黃宗澤 同 胡定欣 就分別憑《法證先鋒V》同《白色強人II》獲得最佳男、女主角獎，佢哋仲對獲得肯定非常開心呀。
而播映時受到觀眾追捧嘅《美麗戰場》就成為呢晚嘅大贏家， 陳瀅 同 陳山聰 分別得到最喜愛男、女演員，Jeannie同 周嘉洛 仲因為《痞子殿下》嘅合作得到最佳CP組合呀。事後Jeannie仲對下月舉行嘅台慶頒獎禮充滿信心，仲估計最佳劇集好有可能係自己有份演出嘅《美麗戰場》同《痞子殿下》之爭喎。
同樣大受觀眾歡迎嘅仲有《下流上車族》嘅車家，呢日佢哋就得到最佳電視劇集喇，而 林敏驄 江美儀 鮑起靜 同 鄧智堅 仲各自得到人氣男女演員獎，不過佢哋就話希望喺台慶頒獎禮搶到最佳劇集獎，不過睇佢哋兩公婆鬥嘴就一樣充滿娛樂性喇。
「芊芊」 郭柏姸 呢日就得到最佳進步女藝人獎，佢傳遍全港嘅魔音搞到車總都擰晒頭，呢日仲斷埋症話重症好長手尾喎，仲話教囡囡唱歌唔會收錢，但係要喺自己演唱會上台唱歌，就Thanks, But No Thanks咁講喇。
而啱啱喺《超能使者》合作完嘅陳山聰 劉佩玥 同得到最佳進步女藝人嘅 劉穎鏇 即將又會再次合作，阿Moon今次仲冇得嘆要出手打，大家仲為佢做定心理準備呀。 黎諾懿 同黃翠如 就獲頒最佳主持獎，翠如仲即場向成為監製嘅諾懿自薦，諾懿仲即刻諗到好Idea喎。
歌唱節目《聲夢傳奇2》得到最佳綜藝節目獎，而「聲夢」出身嘅Aska張馳豪，就同 孔德賢 一齊得到最佳進步男藝人，Aska仲同時獲得人氣創作新人獎，又同Chantel一齊得到人氣合唱作曲獎，而Chantel同JW老師亦分別得到人氣歌手獎呀。
獲得新人優異獎嘅火雞 孫漢霖就話喜出望外，仲話希望有機會可以參與更多戲劇演出咁話呀。而性感現身嘅溫碧霞就得到重唱歌曲獎喇。
